Nna stu viuolu
Passaru nentirimenu già ddu’
anni
e simu sempri cca a
cuntrastari
cu stu virus ca spunta a
tutti bbanni
faciennu smorfi pi-ffarini
scantari.
Na vota si travesti ri
babbeu,
s’ammuccia, pui cumpari
all’impruvvisu
e cu la manu nni fa marameu
pigghiannuni pi fissa
c’un-surrisu.
Cuomu a diri: cca cumannu iu,
uatri a dinucchiuni aviti a
stari
nun ci- av’a- essiri ummira
ri Ddiu,
né prieri, ne missi e mancu
artari.
Tra chiddi scantulini,
certaruni,
a li paroli ri ddu cifirazzu
chiurieru li finestri e li
barcuni
e nna la porta mittieru
n-catinazzu.
Ma chissa è veru vita ri
dannati…
chiusi nta na tana cuomu
armali,
ca simu appiddaveru cunzumati
siddu ra vita chistu è lu
finali.
Ma Ddiu retti lumi a li
scinziati
e nziemula si misiru a
sturiari:
“Stati tranquilli nun-vi
custirnati
sulu sintiti socchi c’è di
fari.
Lu vaccinu è prontu, lestu
curriti,
na punturedda e vi
ntravardati,
si corchi fastiddiu pui avvirtiti
è nenti, m’a saluti
varagnati.”
Ora ognarunu fa la propia
parti,
mierici, nfirmera e vuluntari
e nziemi a iddi nui ri stari
allerti
e ncuraggiari a cu- n-su voli
fari.
Nna stu viuolu unnè ca iu
caminu
viu n-filu r’erva tènniru e
trimanti
è la spiranza ri un nuovu
ristinu,
puru si stanca vuogghiu iri
avanti.
E mentri scrivu sientu
nostargia
ri parienti e amici
r’abbrazzari
e già lu cori forti sbulazzia
pinzannu all’allirizza ri
pruvari.
Graziella Di Salvo Barbera
