Priera di Graziella Di Salvo Barbera

Priera

O patri miu, ranni, abbuntatusu,

ca nni criasti cu tantu e tantu amuri

e nni rasti na terra mmaculata

riciennu a ognarunu: ti la curi.

 

Ma nui pirdemmu ogni virtù e cuscenza

agiennu cuomu figghi sdisinzati

e la sprimemmu raveru finu all’uossu

cumminti r’esseri cuomu li scinziati.

 

E ntrirucemmu nto munnu la superbia,

la disonestà e la furbizzia

assuggittannu li frati li cchiù misiri

e trattannuli peggiu ra munnizza.

 

Ruoppu tanti e tanti malifatti

n’alliemmu c’u mali cchiù putenti,

ora iddu stissu nni sta viniennu contru

cavannuni l’uocchi e puru a menti.

 

E ora, all’impruvvisu chi nni capita

nu n-virus tantu nicu ca n-si viri

ararmau na verra n-tuttu u munnu

faciennu danni ca mancu si cci criri.

 

Senza bbummi e mancu carrarmati,

senza pistoli e mancu lupara,

senza taliari a nuddu tinti o buoni,

si simu puarieddi o miliunara.

 

Sta siminannu morti e malatia

e avi nu nniomu stranu appiddaveru

“Curuna Virus” e gghieri cuomu riri

ca vò rignari nta lu munnu interu.

 

I muorti si cuntanu a migghiara

e i cimiteri nn zunu cchiù capienti,

li casci su mittuti tutti n-terra

ncatastati cuomu fussi nenti.

 

O diu, chistu é nfiernu tali e quali

e nnui nnu miritamu veramenti,

m’a tò misericordia è granni assai

e lu sapimu quantu sì climenti.

 

 

Scinni n-terra ca sempri figghi simu,

puru si stravacanti e disgraziati,

janzi lu sai c’avimu cchiù bisuognu

r’esseri accugghiuti e pirdunati.

 

Eccu Signuri, Tu viri e sì piatusu

ca n-funnu n-funnu vulissimu canciari.

Amàrinni tra nui chi nni custassi?

E mmeci cumminammu sempri guai.

 

La Matri ca nni rasti è ncutumata

ri tanu mali ca nni succiriu,

fallu pi idda ca sempri fu fireli

e Tu agisci sempri cuomu Diu.

 

Gesuzzu ri nna cruci ti priau:

“Pirdunali ca n-sanu socchi fanu”

Eccu, Diu, ascuta la sò vuci,

c’a mia è ddebbuli e arriva ri luntanu.

 

                        Graziella Di Salvo Barbera