Il vangelo di oggi 13 agosto 2025 in dialetto siciliano - VANCELU Mt 18, 15-20

 

VANCELU Mt 18, 15-20

Si t'ascùta, t'arricugghisti a tò frati

U 'nsignamentu di Gesù è n'invitu a èssiri mudirati quannu s'usanu certi rèuli dâ cumunità. A cundanna d'un frati si pò fari sulu quannu iddu pirsèvira ntô mali e s'arrifiuta ogni currezioni dâ sò Chiesa. I virsetti 19-20 fannu capiri ca l'attu dâ currezioni fraterna s'havi a fari nnâ priera e nnâ cumunioni, ca assicùranu a prisenza dû Risortu. pirdunu (vv.

Dû Vancelu sicunnu Matteu

Nnû ddu tempu, Gesù dissi ê sò discìpuli:

«Si tò frati fa un piccatu, và, e parraccì sulu tu cu iddu; si t'ascùta, t'arricugghisti a tò frati; si non t'ascùta, porta cu tia una o du' pirsuni, picchì ogni cosa s'ha diri supra â palora di du' o tri tistimoni.

Si mancu a chisti ascùta, diccillu a tutta a cumunità; e si mancu â cumunità voli sèntiri, allura ppi tia addiventa comu un paganu e un pubblicanu.

N virità vi dicu: tuttu chiddu ca liati n terra, veni liatu macari n celu, e tuttu chiddu ca sciugghiti n terra, veni sciugghiutu macari n celu.

N virità vi tornu a diri: si du' di vuàutri n terra si mèttinu d'accordu p'addumannari qualisiasi cosa, u Patri miu ca è nnê celi ci l'accurderà. Picchì unni ci sunnu du' o tri pirsuni ca si riunìscinu ntô me nomu, ddà, n menzu a iddi, ci sugnu puru iu».

Semu sùbbitu pronti a chiamari l'àutri "piccaturi"; Gesù ni fa diri: "frati ca fa un piccatu". C'è na bella diffirenza tra cu sbàgghia na vota tantu e cu è piccaturi pi daveru. Gesù voli ca cu' vidi un frati piccari, s'avvicina a iddu ppi lu livari d'arreri ô mali: si ci arrinesci, chi granni «guadagnu» ca fici! Picchì u scopu è di sarvari a cu' picca, facennucci sèntiri u disàgiu dû mali; si s'antesta, u ponnu avvirtiri àutri du' o tri; si ancora nun voli sèntiri, allura, davanzi a tutta a cumunità, si ricanusci ca iddu stissu si nni niscìu e nun si cumporta cchiù comu un frati. Nnâ cultura ebbràica, «liari e sciògghiri» voli diri aviri na capacità senza lìmiti di pirdunari. Quantu è diversu stu modu di fari dâ nostra manìa di cundannari a tutti! Nuàutri cristiani n'avèmu a ricanùsciri comu pirsuni pirdunati ca hannu a pirdunari. U priari nzèmmula, ca n'assicura a prisenza spiciali dû Sarvaturi, servi p'aviri tutti i stissi ntinzioni, i stissi spiranzi e un cori granni e làricu ppi tutti, macari ppi cu' picca, ppi cu' nun prega e ppi cu' nun ama.